20/02/2013 18:49:57

Mbaron raundi i pestë i bisedimeve: asnjë marëveshje

Bisedimet do të vazhdojnë në 4 Mars

PRISHTINË - Raundi i pestë i dialogut Kosovë-Serbi në Bruksel, i nisur dje mes dy kryeministrave dhe Baroneshës Ashton, ka përfunduar sot rreth orës 16:00. Sipas medias, takimi ka përfunduar pa marrëveshje, ndërsa bisedimet do të vazhdojnë në 4 Mars.

Radio Europa e Lirë tha se, ka përfunduar dita e dytë e takimit të pestë të bisedimeve në mes të Kosovës dhe Serbisë, në nivel të kryeministrave, Hashim Thaçi dhe Ivica Daçiq.

Në një deklaratë të lëshuar nga përfaqësuesja e lartë e Bashkimit Europian, Catherine Ashton, thuhet se "të dy kryeministrat kanë zhvilluar takime të martën dhe të mërkurën, në kuadër të dialogut të ndërmjetësuar nga BE-ja për normalizimin e marrëdhënieve, ku kanë zhvilluar diskutime të thella".

"Ata janë kthyer në kryeqytetet e tyre për konsultime dhe do të kthehen më 4 Mars në Bruksel, për takimin e radhës", citohet të ketë thënë baronesha Ashton, ndërsa është shprehur se "kryeministrat janë të kënaqur me përparimin thelbësor që kanë arritur, ashtu sikurse edhe unë". Ende nuk ka informacione se për çfarë përparimesh bëhet fjalë saktësisht.

HermesNews - ©2013

Dërgo me email | Stampo artikullin